Bálfarafélag Íslands
Stofnað 6.júlí 2021
Tilgangi Bálfarafélags Íslands verður náð með því að:
Vekja athygli almennings á núverandi fyrirkomulagi bálfara á Íslandi.
Vekja athygli almennings á nýjum möguleikum er varða bálfarir og meðferð ösku.
Berjast fyrir auknu valfrelsi almennings er varða lífslok og veita fræðslu um ólíka möguleika.
Taka þátt í alþjóðlegu samstarfi bálfarastofa.
Varðveita sögu líkbrennslu á Íslandi og þeirra frumkvöðla sem börðust fyrir bálförum.
Aðstoða við að afla fjár til byggingar bálstofu Tré lífsins í Rjúpnadal í Garðabæ.
Bálfarir á Íslandi og Bálfarafélag Íslands
Tilgangur Bálfarafélags Íslands er að opna umræðuna um fyrirkomulag bálfara á Íslandi og styðja við stofnun sjálfstæðrar bálstofu sem er óháð öllum trúar- og lífsskoðunarfélögum en öllum opin.
Bálförum hefur farið ört fjölgandi á undanförnum árum og eru þær nálægt 1.000 á ári, en árið 2020 létust 2.301 einstaklingar á Íslandi.
Bálfarir á Íslandi eru framkvæmdar í bálstofunni í Fossvogi í ofni sem hefur verið í rekstri frá árinu 1948 eða í 73 ár. Mengunarvörnum er ábótavant því enginn hreinsibúnaður er á ofninum og er hann orðinn barn síns tíma.
Kirkjugarðar Reykjavíkurprófastsdæma reka bálstofuna í Fossvogi og fá til þess fé af fjárlögum sem úthlutað er af Kirkjugarðaráði. Auk bálstofunnar er þar að finna Fossvogskirkju, kapellu, bænhús, líkhús, skrifstofur og Fossvogskirkjugarð.
Bálfarafélag Íslands vill halda á lofti þeim hugsunarhætti frumkvöðla um bálfarir á Íslandi, sem komu fyrstu bálstofunni á laggirnar, að gera útfarir ódýrari en nú tíðkast.
Einnig þykir okkur mikilvægt að hugað sé að umhverfinu í hvívetna og því er þörf á nýjum ofni með fullkomnum hreinsibúnaði og öflugum mengunarvörnum.
Samfélag okkar hefur tekið miklum breytingum frá því sem var á fyrri hluta tuttugustu aldar og samfélagsgerðin orðin fjölbreyttari.
Okkur þykir eðlilegt að valfrelsi og lífsskoðanir fólks séu virtar í lífi og við lífslok og þykir mikilvægt að í boði séu fleiri valmöguleikar en eru í dag.
Þessvegna styður Bálfarafélag Íslands við stofnun nýrrar, óháðrar og umhverfisvænnar bálstofu Trés lífsins- bálstofu og Minningagarða ses.
Tré lífsins er sjálfseignastofnun sem stýrt er af stjórn og starfandi stjórnarformanni, Sigríði Bylgju.
Tré lífsins hefur fengið úthlutaðri lóð í Rjúpnadal í Garðabæ þar sem til stendur að reisa bálstofu og fyrsta Minningagarðinn á Íslandi. Í höfuðstöðvum Trés lífsins verða fjölnota salarkynni sem bjóða upp á fallegar athafnir, allt frá skírn til ferminga, hjónavígslna og hinstu kveðjustunda.
Vefsíða Trés lífsins- bálstofu og Minningagarða ses.
Stjórn Bálfarafélags Íslands
Forman: Sigríður Bylgja Sigurjónsdóttir.
Meðstjórnendur: Halla Kolbeinsdóttir, Sigurjón Már Guðmannsson, Lilja Baldursdóttir og Berglind Sigurjónsdóttir.